Pothuajse një e treta e pjesëmarrësve të rastësishëm në testimin serologjik në kryeqytetin e Indisë, New Delhi kanë qenë pozitiv në antitrupat karakteristike për persona që kanë tejkaluar infeksionin e COVID-19, transmeton Anadolu Agency (AA).

Ministri i Shëndetësisë në New Delhi, Satyendar Jain deklaroi se në javën e parë të muajit gusht në këtë rajon janë testuar mostrat e gjakut të 15 mijë qytetarëve dhe se 29.1 për qind të mostrave kanë pasur antitrupa të koronavirusit.

Ai tha se numri real i personave të infektuar me COVID-19 në New Delhi është shumë më i madh se rastet e konfirmuara.

New Delhi ka një popullsi prej 27 milionë banorësh dhe testimet e fundit të rastësishme tregojnë se rreth 9 milionë persona në këtë qytet mund të kenë qenë të infektuar me koronavirus.

Test pozitiv serologjik për antitrupat e koronavirusit tregon se personi ka të ngjarë të ketë qenë i sëmurë ose akoma i infektuar asimptomatik me koronavirus.

India, pas SHBA-ve dhe Brazilit, është vendi më i goditur nga pandemia e COVID-19 me 2.9 milionë raste të konfirmuara, përfshirë më shumë se 155 mijë të infektuar në New Delhi.